Siumut Sermitsiaq pillugu tusagassiuutit pillugit aalajangiisartunut maalaarpoq

Add paragraph text here.

Tusagassiorfik Sermitsiaq Karl Kristian Kruse, Henrik Fleischer Nikkulaat Jeremiassenilu pillugit uppernassusaannik innarliisumik sakkortuumik isornartorsiuimmat Siumup sakkortuumik isornartorsiorpaa.

Sermitsiap saqqaani sapaatip akunnerani 37-imi saqqummersitaminik allappaa:
”Paasisaasut: Akileraartartut aningaasaataannik umiatsiaararsisut”, tamannalu imatut paasineqarsinnaavoq politikerit pineqartut paasissutissanik isertuussisimasut, aammalu inatsisinik tunngaveqarnatik pisortat aningaasaataat atornerlullugit angallateerarsisimasut.

Karl Kristian Kruse, Henrik Fleischer Nikkulaat Jeremiassenilu pisortat aningaasaataannik atornerluisutut eqqunngitsumik nivinngagaallutik misigisimapput, inatsimmi pineqartumi pisinnaatitaammata aningaasatigut tapiiffigineqarsinnaallutik, tamannalu pissutigerpiarlugu tusagassiuutit pillugit aalajangiisartunut maalaarput.

Siumup politikkikkut oqaaseqartartua, Karl Kristian Kruse, imatut oqaaseqarpoq:
"Henrik Fleischer, Nikkulaat Jeremiasenilu peqatigalugit Sermitsiap uagutsinnut eqqunngitsumik pisuutitsinera pillugu ullumi tugassiuutit pillugit aalajangiisartunut maalaaruteqarpugut. Ilanngutassiaq illuinnaasiorluni eqqunngitsumik pasilliinernik mamarliinernillu imaqartillugu allataavoq. Pisortat aningaasaataannik atornerluisimasutut eqqunngitsumik nivinngagaalluta misigisimavugut, uffalu aalisarnermik aningaasatigut tapiissuteqartarnermit inatsimmi pisinnaatitaaffigigipput tapiiffigineqarsinnaalluta. Tusagassiorfiup avataaniit ikiortilerluni mamarliinera pasinarsaarineralu akuerisinnaanngilara.”

Ilanngutassiamittaaq aamma qinikkat pineqartut immikkut pineqarsimasutut isikkoqalersillugit pasitsassaarisoqarpoq, tikkuartorneqartut ilagaat qinnuteqaatitik aalisartunut allanut naleqqiullugit sukkanerusumik suliarneqarnissaat sulissutigisimagaat, taamaalilluni pinerluttoqarsimassasoq pasinarsarneqarluni. Tusagassiorfiup Sermitsiap tikkuartunngitsuugaa tassaavoq allaffissornikkut aalajangersakkat sumininnguamilluunniit politikkikkut akuleruffigineqarsinnaanngimmata, allaaserisami tapiissuteqartarnermut tunngasutigut taaneqartumi.

Karl Kristian Kruse, nangeqqippoq:
”Aalisartuullungalu piniartuuvunga. Qinigaavunga politikikkut suleqataasussatut. Inuit qinersimavaannga, soorlulusooq ilaatigut nalunngikkaat aaliasartut piniartullu atugaat pitsanngorsarniarlugit suliaqartartugut. Qinikkatut isersimagaanni inuussutissarsiutaassanngilaq, taamaattoqassapammi inuit isummersortarnertik qunugilissavaat inuussutissarsiornertillu annaanissaa ernumassutigissallugu. Aalisartuunera piniartuuneralu inuussutissarsiutigaara, taamaammat uanga, aalisartutut piniartutullu allatut malittarisassaasut assigalugit qinnuteqarnikuuvunga tapiiffigitissimallungalu. Maanna tusagassiinermut tunngasunut aalajangiisartut suliaq nalilersortariaqarpaat”.