Siumup nuna tamakkerlugu ataatsimeersuarnissaa piffissamut aalajangerneqanngitsumut kinguartinneqarpoq

Covid-19 peqqutigalugu aamma innuttaasut peqqinnissaat pillugu Siumup nuna tamakkerlugu ataatsimeersuarnissaa kinguartikkallarneqarpoq.

Siumup siulersuisuuneri COVID-19-ip malitsigisaanik peqqissutsikkut uloriarnartorsiorsinnaaneq peqqutigalugu ataatsimeersuarnissaq Ilulissani katersuulluni pisussaq pilersaarutigineqaraluartoq kinguartillugu aaliangerput, aaqqissuussinissaq illersorneqarsinnaajunnaarmat. Sinerissami peqatigiiffiit ataasinngormat unnukkut ilisimatinneqarput ataatsimeersuarnissaq piffissamut aalajangerneqanngitsumut kinguartikkallarneqartoq.

Siumup aaqqissuussaanermut siulittaasup tullia, Evelyn M. Frederiksen, oqaaseqarpoq:
”Ingerlaavartumik pissutsit ineriartornerat malinnaavigisimavarput. Nunap iluani nunallu attavigisatta akornanni. Covid-19-ip Europami Nunanilu Avannarlerni ineriartornera ernumanarpoq. Naak nunatsinni Covid-19-imik piffisami sivisulaartumi tunillatsittoqarsimanngikkaluartoq, suli nappaassuup tuniluussinnaanera nalorninartoqarpoq. Nalorninartoq tamanna sillimaffigisariaqarparput, pingaartumimmi aallartitat najugaqarfinniit 36-init 60-it sinnerlugit peqataassatillugit.”

Ataatsimeersuarnissap aaqqissuunneqarnerata suliarineqarnera annertoorujussuuvoq, Evelyn M. Frederiksen oqarpoq, nangipporlu:
”Maanna partiip ataatsimeersuarnisaata pingajussaa kinguartinneqarpoq. Piareersarnernut piffissangaatsiaq nukiillu, piumasaqaatinut assigiinngitsunut aaqqissuussisunit atorneqarsimapput. Aallartitat amerlasuut nuna tamakkerlugu ataatsimeersuarnissamut peqataaniarlutik suliffimminniit sulinngiffeqarniarsimapput. Tamanna uggornartorujussuuvoq, kisianni isumaqarpugut nunatsinnut partiimullu piffissami matumani taama aalajangerneq peqqissaarnerusoq.”

Politikkikkut katersuunnissanut Covid-19 pillugu nalunaarummi ilaanngikkaluartut, taamaasillunilu kommunit killeqarfii pitarlugit katersuunnissat periarfissaagaluartut, kattuffiit allat malillugit kingullertigut aaqqissuussinernik unitsitsisimasut partii taamatut aalajangersimavoq. Evelyn M. Frederiksen, nangippoq:
“Innuttaasut peqqinnissaat partiillu ataqqinassusaata illersornissaa pillugit tamanna qinersimavarput. Maanna Covid-19 pillugu pisoqarnera nunatta aningaasaqarneranut innuttaasullu peqqinnissaat kisiat tunngavigalugu pisoqannganngilaq. Kisianni tamat oqartussaaqataanerat sutigut tamatigut illersortariaqarparput. Taamaattumik piffissamik aaqqissuussinermillu naammaginartumik nuna tamakkerlugu piaartumik ataatsimeersuarsinnaaqqulluta nassaartariaqarpugut. Oqallinneq tamanna akornatsinni ingerlatissavarput.”