Piffissami kingullermi kikkut tamarmik isaat Siumumut sammipput, tamanna tupinnartuunngilaq, inuiaqatigiimmi ingerlatitaaneranni Siumut akisussaasuummat, aamma tamanna qimarratiginavianngilarput.
Erseqqissaatigissavarput Siumup siulersuisuunerisa aammalu Siumup inatsisartuni gruppiata Partiip siulittaasua Erik Jensen tamakkiisumik tapersersormassuk tunuliaqutaaffigalugulu.
Parti Siumut ilaasortanit tunuliaqutaqarluni ingerlanneqarpoq, ukiut pingasukkaarlugit ataatsimeersuartartoq, kingullermik novemberimi 2020-imi ataatsimeersuarnermi ilaasortat aallartitaasa qinersinermikkut oqariartuutigaat Erik Jensen Siumumi siulittaasuussasoq. Taama periuseqarneq partiip aallartinneraniilli atuuppoq ataqqineqartuarsimallunilu.
Nunatsinni partiini anginerpaatut, pisussaaffeqartutut inuiaqatigiinnilu akisussaaffimmik tigusilluta, partiit allat Siumumit suleqatiseralugit oqaloqatigisimavagut, partiilli maanna inatsisartuutitaqartut amerlanerussuteqarluartut qinersinissaq orniginartinneruaat. Siumumiilli apeqqusigarput unaavoq, ilumoorlutik Siumut kisimi suleqatigiissinnaannginnermut pisuusimappat, taava sooq partiit allat amerlanerussuteqarluarlutik iluminni isumaqatigiillutik, Inatsisartuni ilaasortat akornanni 31-usuni 21-iullutik Naalakkersuisooqatigiiliorsinnaanertik ingerlatiinnanngilaat qinersiviup sinnerani?
Siumumi partiip ataatsip iluani ajornartorsiutit kisiisa tunngavigalugit ikerinnakkut qinersititsinissaq orniginartinngilarput. Taamaattumik tatiginninnginnermik taasititsisoqassappat Siumumit pinngit-soortitsinissamik siunnersuuteqassaagut, suliat ingerlanneqartut unittuunnginnissaat aallaavigalugit.
Qinersinissaq Siumumi orniginartinngikaluarlugu oqassaagut qulannginnatta.
Ikinngutinnersumik inuulluaqqusilluta
Erik Jensen
Siumup siulittaasua
Hermann Berthelsen
Siumup Inatsisartuni gruppiata siulittaasua