Nunaqarfeqqortunerput nukittoqqutigaarput

Piniakkat malillugit piniarfigissunut nunassittarnerit siulersuatta ilisarnaartigaat. Illoqarfissuarni katersuulluni inooqatigiinnissaq periarfissaanngilaq, kikkummi tamarmik inuussutissaqartariaqarput piniagassaqarlutik.

Taamaattariaqanngilarli.

Kalaaliusugut nunaqarfeqarnerput allanit allaanerussutigaarput. Nunaqarfiit kultooritsinni qitiusuinnaanngillat, inuiaqatigiittulli atanitsinnut qitiulluinnartuupput. Siammasissorujussuarmillu inuusaaseqarnitsinni nunaqarfiit piniartukkormiunut aalisartukkormiunullu pitsassuarnik piniarfigissunik aalisarfigissunillu periarfissiipput. Tassuunalu nunaqarfiit nunatsinnut kivitseqataalluinnarlutik inissisimapput, taakkuuppummi nunatta pisuussutaanik avammut tunisaqartarnermi aalisarnikkut piniarnikkullu atorluaanermi nammaqataanerpaat.

Taamaattorli ilisimavarput nunaqarfinni inuuniarneq oqimaattorujussuusinnaasartoq. Pisariaqartitanik ikiorserneqarsinnaaneq ajornarnerujussuuvoq, ilinniarsimasunimmi ilinniartitsisoqarnissaq, perorsaasoqarnissaq, peqqissaasoqarnissaq isumaginninnermullu siunnersorteqarnissaq nunaqarfinni ajornartorsiutaammat.

Taamaammat nunatsinni tamarmi aaqqissuussaanikkut ineriartortitsineq sukataarutigilluinnagaraara. Internettikut attaveqaatitigut, mittarfiit nutaat pilersaarusiornerisigut, angalasunik kiffartuussinissamik isumaqatigiissutitigut nutaanillu piginnaasaqqortunerungaatunik helikopterisinikkut nunaqarfinnut iluaqutaasussatut siunertaqarlunga.

Internikkikkut attaveqaatit nutarternerisigut nunaqarfiit nunarsuarmiooqataalersinneqarput. Periarfissanut nutaanut matut inunnut ataasiakkaanut ammarput, tamatsinnullu kiffartuussinernik pitsaanerusunik ammaalluni.

Siornatigummi nunaqarfinni illoqarfinnilumi mikinerusuni qitornat ilinniaqqinnissaannut aggululluni isumannertoqartarpoq, qitornatik ungasissumut aallarnissaat pillugu, aammali ilinniariartornissaannut tapersersuillutik taamaattorli nunaqarfimmut uteqqinnginnissaannik sioorallutik.
Ilinniartitaanikkut aaqqissuussaanerput nutaamik eqqarsaatersorfigissallugu periarfissanngorpoq. Tassani inuusuttortagut nunaminnit ilaquttaminniillu aallaqqaarlutik ilinniartariaqarnerat allatut aaqqinneqarsinnaavoq. Tassa internet atorlugu ilinniarsinnaanissat aqqutissiuuttariaqarpavut.

Nunaqarfinni ilaqutariinnguit pileraangata naliginnaasuusarpoq uiusoq aalisartuunngikkuni piniartuusartoq, nuliaasorlu angerlarsimaannartarluni. Takorlooruk maanna periarfissiissutitta eGUX-p sumiiffik qimanngikkaluarlugu ilinniakkap assinganik ilinniakkaik allanik ingerlatsisoqarsinnaalerpat.

Internettimik pitsaasumik periarfissaqarneq tunngavigalugu peqqissaasut pitsaasorujussuamik sullissisinnaasarput, nakorsat allamiittut peqatigalugit katsorsaasinnaasarlutik. Tassa tunngavisumik nakorsaq nunaqarfimmiiffaarittariaqanngilaq, sumiissinnaavorluunniimmi, taamaallaat internettimut attaveqarsinnaaguni naammalluni.
Tamatigut nunaqarfimmi najugalik ass. peqqissaasutut ilinniagaqareeraangat nunattalu avataaniit ilinniarsimasunik taarsiilluni, ilinniarsimasunik amigaateqarnerput ikiliallattarpoq, inuiaqatigiinnullu aningaasaqarnikkut iluaqutaalersarluni. Aningaasartuutit nunatsinni innuttaasunut atorusunneruakka, inuuniarnitsinnullu pitsanngorsaataatillugit.
Tamatigut arlarput perorsaasunngoraangat, ilinniartitsisunngoraangat imalt. Isumaginninnermut siunnersortinngoraangat, nunaqarfitsinni meerartavut pitsaasumik paarineqarsinnaanissaannut periarfissaqalersarpoq, meerartavut pitsaasumik atuartinneqarsinnaanissaannut periarfissaqalersarpoq, meerartarta ikiortariallit ikiorserneqarnissaannut qulakkeerinninnissaq periarfissaalersarpoq, aammalu sulisussaaleqineq annikilleriartarluni, avataaniillut tikisitsilluta sulisitsisariaqarunnaassalluta aningaasartuutaangaatsiartunik.
Taamaaliornikkut inoqarfinni mikinerusuni inuuniarnikkut atugarisat pitsanngorseriartinneqarsinnaapput, malitsigisaanillu inoqarfinnut mikinerusunut nuukkusussuseqarnerulertoqarsinnaassalluni.
Naak illoqarfiit assigiinngitsorpassuarnik pitsaasunik periarfissaqaraluartut, illoqarfissuarni inuuneq tamatsinnut naleqquttuujuaannanngilaq. Suli nunatta pisuussutit tunniussai atorluassagutsigit siammasissumik inuusaaseqarnissarput piarsiaqartipparput.

Attaveqaqatigiinnerup aaqqissugaanera suli pitsanngorsartuartariaqarparput. Taamaattumillu massakkut periarfissaasut nutaat atorluartariaqarpagut. Nunaqarfigut nunatta nukittoqqutigai, nukittoqqutigiuarsimavaalu. Kiisami illoqarfiit nunaqarfiillu ineriartortissinnaanngorpavut.