Hans Egedep eqqaassutissaa imaanut iginneqartariaqanngilaq

Nuummi nuutoqqami Hans Egedep eqqaassutissaa sapaatip akunnerini kingullerni annertuumik oqallinnermik pilersitsivoq. Ilaatigut sakkortuuliortoqarpoq aamma misigissutsinik aalassatsitsivoq. Siumup tungaaniit, eqqaassutissap aserorterneqarnissaa imaluunniit imaanut iginneqarnissaa kissaatiginngilarput. Kisiannili eqqaassutissap inissisimaffissaa pillugu oqallinnissaq tikilluaqquarput. Soorunami Nuummi innuttaasut ataatsimoorlutik eqqaassutissap sumiinnissaa aalajangissavaat.

Nunasiaagallarnerup nalaa pillugu oqallinneq isigaara annerujartuinnartumik kulturerput aamma kinaassuserput pillugu misigisimaneq pigileriartoripput. Tassami innarliinerit nunasiaagallarnerup nalaani pisimapput. Qujanartumik ullumikkut innarliinerit akuersaarsinnaanngilavut. Oqallinnerup takutippaa suli iliuuseqartoqartariaqartoq, oqaluttuarisaanitsinnik ilisimalersitsisumik aamma inuiattut namminersortutut siunissarput qanoq isigineripput.

Aserorterinikkut taamaasiornavianngilagut kisiannili oqaloqatigiinnikkut. Tamat oqartussaaqataaneranni taamatut iliortarpugut.

Kingullermik 2017-imi Saammaasseqatigiinnissamik Ataatsimiititaliaq politikkikkut arlalinnik innersuussuteqarpoq oqaluttuarisaanitsinnik nukittortitsisinnaasumik aamma qanga pisimasunut saammaassinissatsinnik. Suli tassa suliaqarnissarput piumasaqaataavoq aamma ilisimasagut oqaluttuarisaanerpullu nukittortinniarlugu taamaalillutik inuusuttortatta kulturikkut oqaluttuarisaanerput oqaatsivullu ilinniarnissammatigit.

Kultureqassaagut oqaluttuarisaanitsinnik inissaqartitsisumik – ajunngitsuni ajortunilu. Kalaallit kulturiat qanga pisarnitsinnik aallaavilimmik tunngaveqarpoq, nunasiaanitsinni oqaluttuarisaaneq piviusorlu mutiusoq. Pisinnaasariaqarpugut qanga pisimasut, ullutsinni siunissatsinnilu inissaqartissallugit. Qanga pisimasut paasisariaqarpavut. Ullumikkut pisut akisussaaffigalugit, siuniussarpullu ajunnginnerusoq sulissutigalugu. Siumumi taamaasiorpugut.