Folketingimut qinersisoqarnissaa pingasunngormat avammut nalunaarutigineqaraluartoq ministeriunerup ammaalluni oqalugiaataa tunngavigalugu sisamanngormat oqallittoqarpoq. Siumumit Aki-Matilda Høegh-Dam ilanngulluni oqalugiarpoq
Danmarkip nunasiaateqarsimanera pillugu Folketingimi siornatigut oqariartuuteqartoqarnikuunngitsoq Aki-Matilda Høegh-Dam siullersaalluni Danmarkip nunasiaateqarsimanera tikkuarpaa. Tunngaviusumik inatsit 1953-mi atuutilermat nunasiaateqarneq atorunnaartoq oqaatigineqartarpoq. 1960-ikkunnili Kalaallit Nunaannut eqqunngitsuliorneq aallartippoq, Aki-Matilda Høegh-Dam oqarpoq.
– Kisitsisinngorlugu tamanna uppernarsarsinnaavara. 1960-mi Kalaallit Nunaanni ataasiaannarluunniit imminut toquttoqanngilaq. 1900-p ingerlanerani aamma taamaappoq, imminut toquttoqartarnera akuttusoorujussuusarsimavoq. Kalaallit Nunaanni toqusut amerlavallaartanngingaarmata, ukioqartarpoq ilaatigut danskit amerlanerusut Nunatsinni toqusartut, Aki-Matilda Høegh-Dam oqalugiarnermini oqarpoq.
– Aamma Canadami nunap inoqqaavi taama atugaqarsimapput. Canadap ilaani imminut toquttartut amerlasarsimasut, nunalli inoqqaavisa immikkoortortaqarfianni assiliaq allaalluni. 1900-kkunni pissutsit taamaapput. Danskinit taaguuteqartinneqartoq ”Nuannisarfiit 60-ikkut” taava pilerput., Aki-Matilda Høegh-Dam nangippoq.
Oqaatiginiarneqartartumi ”Nuannisarfinni 60-ikkunni” imminut toquttartut amerlipput, nunarsuarmi kisitsit qaffasinnerpaanngorluni. Imminut toqunneq, 1960-ip siuliani imminut toquttoqartarsimanngikkaluartoq atuutilerpoq. Susoqaramiuna? 60-ikkunniuna susoqarsimasoq?” Folketingimi ilaasortat akornanni inuusunnerpaaq aperaaq, nangillunilu:
– Danmarki iliuuseqartitsivoq piffissami tassani. Danmarki misilittaavoq. Danmarki kinaassusersiuivoq. Danmarki naartusinnaajunnaartitsilluni iliuuseqarpoq. Danmarki inoqarfinnik matooraavoq. Danmarki pinngitsaaliissummik qimagussuisitsivoq. Danmarki aserorteraluni sanaartuivoq. Kulturi, ilaqutariit, kinaassuserput inuiaqatigiillu eqqorneqarlutik.
– Spiralilersuisimanerup pissutigisimasaanik arnarpassuit meerartaarsinnaajunnaarsinneqarput. Danskinik meerartaartoqalaarpoq – danskilli meeqqatik akisussaaffigisariaqanngikkaat inatsisitigut pisinnaatinneqarput. Meeraasut kingornussisinnaanngillat, aningaasaatikitsuunissaat siunnertarineqarluni. Anaanaasormi inatsisit pissutigisaannik aningaasarsiakinnerutinneqarpoq, ilaquttami inoqarfianukarsinnaanngilaq, inoqarfimmi Danmarkimit matuneqarnikuuvoq, 25-nik ukiulik Aki-Matilda Høegh-Dam oqarpoq.
Siumut tunuliaqutaralugu Folketingimut qineqqusaartut aamma eqqaavai. Qineqqusaartut tassaapput 29-nik ukiulik Elvira Kûitse, 35-nik ukiulik Karina Zeeb kiisalu 56-inik ukiulik Markus E. Olsen.