Ataqqinartoq Jonathan Motzfeldt

25.09. 1938 – 28.10.2010
Kalaallit Nunatsinni Naalakkersuisut siulittaasuisa siullersaat toquvoq.

Nunatta oqaluttuarisaanerani nutaanerusumi naalakkersuinikkut sunniuteqarnerpaaq Siumullu pilersinneqarnerani Siulittaasoq siulleq, Nunatsinnut ernurulluartoq, Ataataasoq, Siuttuusoq, Ikinngutaasoq, tamatta Kalaallit Nunatsinni pigisarput Jonathan Motzfeldt, Junnuk sivisuumik napparsimareerluni ippassaq toqukkut qimaguppoq.

Nulianut Kristjanamut, qitornaanut, qatanngutaanut ilaqutaanullu qamanngavik pisumik misiginneqataangaarnerput ingerlatipparput.

Junnuup inuunermini nukissani tamaasa Kalaallit Inuiannut atorpai anersaakkut timikkullu pitsaanerpaamik atugaqartikkumalluta.

Junnuup qasusuilluni assoralisimaartaraluarluni siunnerfik ersarissoq takorluukkani upperalugu angutserlugulu suliuarnerata kinguneraa ullumikkut Kalaallit Inuiattut akuerisaammata, Kalaallit Nunaat pisuussutsiminik piginnittussaammat, Kalaallit oqaasii pisortatigoortuummata minnerunngitsumillu Kalaallit Nunaat Tunngaviusumik Inatsisiliorluni aallartissinnaanngormat.

Junnuup suliarpassui angusarpassuilu Inuiaat Kalaallit ilisimavai oqaluttuarisaanermilu pingaaruteqarluinnartutut allassimalerput.
Junnuk Ataqqingaarparput, asangaarparput, nersungaarparput aammalu qujangaarpugut.

Jonathan Motzfeldt, Junnuup eqqaaneqarnera ataqqinartuuli.