Namminersornermut quppersagaq - Siumut
Namminersornermut aviisi - Nammineerta
Siumut namminersornermut angerpoq
Namminersornermik siunnerfeqarnerput 1999-imiilli aallartipparput, taamani kalaallit namminneerluta Namminersorneq pillugu Isumalioqatigiissitamik pilersitsigatta. Suliami tassani innuttaasut tusarniarneqarput, ilaatigut Namminersorneq pillugu Pisortaqarfiusimasumit innuttaasunik ataatsimiititsisarnerpassuit ingerlanneqarlutik. Taakkunuunatigut kingusinnerusukkut kalaallit qallunaallu Namminersorneq pillugu Isumalioqatigiissutaliaanut piumasarisassavut ilaatigut erseqqissarniarsimavagut.
Tassa Namminersornerup imarisassai piumasaqaatigisavullu sivikinnerpaamik ukiuni qulingiluani eqqartorpagut. Namminersorneq innuttaasunit akuersissutigineqassappat ukiorpassuarni eqqartortuarsimasagut piviusunngortinneqarsinnaalissapput, soorlu makkuusut:
- inuiattut akuerisaaneq
- kalaallisut oqaatsigut pisortatigoortumik oqaasiussasut naqissuserneqassaaq
- nunap pisuussutaanut tamanut piginnittussaaneq
- annertunerusumik oqartussaassuseqarusunneq
- namminiilivissinnaanissamut, taamaalillunilu nunatta naalagaaffinngorsinnaanissaanut, periarfissaqartitaarusunneq anersaajummat
Nuna manna uagut inunngorfigaarput siulitsinniit kingornussaralugu aamma siulitta siuliminnit taakkulu siuliminnit kingornussaraat. Nuna manna uagut kinguaatsinnut pigisassatut ingerlateqqittussaavarput aamma taakku kinguaassaminnut pigisassatut ingerlateqqittussaavaat. Siulivut ukiorpassuarni nunami asasaminni inuuniarfikkuminaassinnaasumi peqqarniissinnaasumilu avataaniit ikiorneqarnissamik isumalluuteqaratik inuusinnaasimapput.
Siulitta nuna manna inuiannut allanut tunniussimanngisaannarpaat aamma tunniutinngisaannassavarput.
Aap, taqitinniarneqartaraluarpugut. Isit avataaniit isigisut nalilersuisullu amerlaqaat. Inuiattut ajornartorsiutigisavut neqitsiullugit nakkarsarniarneqartarpugut. Assigiinngitsorpassuartigut ajornartorsiuteqarnerput miserratigineqarsinnaanngilaq, taakkuli aaqqiiviginiarlugit sorpassuartigut iliuuseqarluta suliatsinnik ingerlatsivugut.
Ajornartorsiutivut isiginngitsuusaarlugit miserratigalugillu ingerlatsiniarsarinngilagut, imaanngilarmi inuiattut ajornartorsiuteqaratta nammineerluta aalajangiisinnaassuseqarnerput ineriartortinneqassanngitsoq. Inuk imminut oqartussaaffigisoq kisimi akisussaassusermik pigisaqartuusarpoq, tamanna eqqaamassavarput.
Inuiaassutsip tulluusimaarutigineqarnerani qitiuvoq inuiaat tarningat, inuiaat anersaavat, inuiaassutsip qiterisaa, inuiaat namminiussusiata ineriartorneratalu sukarisassaa, allamullu sangusuussanngikkaanni ilisimassallugu pisariaqavissoq.
Novembarip 25-anni 2008-mi Namminersorneq pillugu innuttaasut taasitinneqarnerisa inernissaa pissangalluta qilanaarlutalu utaqqissavarput, erseqqissassavaralu Siumukkut tamakkiisumik akuersaaqataaniarmata.
Hans Enoksen
Siulittaasoq
